Sør-Aurdal kommune stiller seg bak den sams uttala til utsendt tiltaksplan for jordbruket i Innlandet 2022-2024.
Tillegg:
Fjellandbruk:
Valdreskommunene meiner at fjellandbruket i Innlandet (25 kommunar) er så sentralt at det kvalifiserer til ein større plass i omtalen og handlingsdelen.
Fjellandbruket har særlege utfordringar knytt til bruksstruktur, klima og produksjonsgrunnlag. Det ligg likevel store mulegheiter i bruk av gras- og beiteressursane i fjelltraktene, m.a. utmarksbruken og stølsdrifta. Ei god utnytting av ressursane som fjellområda representerer vil bidra til auka matproduksjon og sjølvforsyning, styrka grunnlaget for arbeidsplassar og bosetting, ivareta kulturlandskapet og oppretthalde det biologiske mangfaldet gjennom tilpassa beitebruk.
Fjellandbruket har gode føresetnader for å produsere mat med særpreg og levera naturbaserte opplevingar. Dei særeigne fortrinna og markedsmoglegheitene som fjellandbruket har, bør utviklast og utnyttast. Fjellandbruket sitt potensiale til å produsere alternativ til dei grovfôr-baserte husdyrprodukta slik som bær og grønnsaker, bør også ha fokus.
Utvikling av fjellandbruket med reduserte fotavtrykk på klima blir svært viktig. Her ligg det moglegheiter i agronomiske tilpassingar og driftspraksis generelt, utvikling av plantesortar, utnytting av potensiell karbonbinding på innmark og store beiteareal spesielt og auka forståing av klimaverknad av ulike driftssystem. Det ligg også moglegheiter i utvikling av kunnskap og innsatsfaktorar (t.d. plantesortar) for å møte framtidige verknader av eit klima i endring. Dette blir viktig kunnskap for å nå mål om bærekraftig auka matproduksjon og sjølvforsyning.
Det er ønske om at planen har ein klar strategi for fjellandbruka med målretta verkemiddel slik at fjellandbruket kan ha økonomisk bærekraft.